IT solutions All In one @AbuchuTechInfo

📗📒📕📗📒📕📗📒📕📗📒📕

ይገርማል ሲባል መገረም አለ፡፡ ለሕይወት ሲሆን ዳርቻ ነው፡፡ ውብ ነው ሲባል መደነቅ አለ፡፡ ለሕይወት ሲሆን መጨረሻ ነው፡፡ ዳሩ ግን እንዲህ እንላለን እንጂ አውቀን አናውቅም፡፡ ደርሰን አንደርስም፡፡ ዓለም በውሳኔ ስላልጸናች ማንም የበራለት ከሕይወት ከፍሎ ቢያሳየን እንጂ በሙላት አይነግረንም፡፡

ደግነት ከነድንበሩ ምን እንደሆነ ለይተን ባናውቀውም ደግነት አለ፡፡ ክፋትም እንዲሁ፡፡ አንድ ነገር አልገባ ብሎ መግለፅ ስለቸገረን የለም ሊባል አይችልም፡፡ ምክንያቱም አንድ ነገር ከእውቀት ከፍ ባለ መረዳት ይህም ከቃል መገለጥ በላይ ሆኖ በውስጣችን ገዝፎ ሊታይ ይችላል፡፡
ነገርግን በውስጣችን ያለው ተፈጥሮ የራስ ፈቃድና ምርጫ ከሌላው ጋር አለመመሳሰል አንድ ወጥ  ወደ ሆነ የጋራ መልክ አንዳንደርስ ችግር ይሆንብናል፡፡ ጉዳዩ ሰው ሰራሽ ሳይሆን የሕይወት ተፈጥሮአዊ መልክ ይመስላል፡፡

ገብቶ ያልገባን' ቅርብ ሆኖ የራቀብን አንድ ነገር አለ፡፡ እንደ ተፈጥሮ ሕግ እየኖርነው ቢሆንም የዚህን ሙሉ እውነታና መብት ግን ስናከብር አንታይም፡፡ የማያምኑት አማኞቹን ‹‹እዚህ እምነት ላይ የደረሳችሁት እየተጠራጠራችሁ መኖር ስለደከማችሁና ለማረፍ ስትሉ ነው›› ይሏቸዋል፡፡ እነሱስ? ሰው ከእምነት ውጭ ሊሆን አይችልምና ወደ አለማመን የሄዱት በምን ሆነ?  በጥርጣሬ አይደለምን?

ጥርጣሬስ እግዚአብሔር አለ ብሎ ቆይቶ ላይኖር ይችላል ብሎ ማሰብ ብቻ ሳይሆን በእግዚአብሔር አለመኖር ሀሳብ ውስጥ ከርሞ ሊኖር ይችላል ብሎ ወደ መቀበል መሄድን አይጨምርም?

ሕይወት ምስጢር ነች፡፡ ለእኛ የተፈቀደው ይህንን ማግኘት ሳይሆን በገባን መጠን እየኖርን ማለፍ ነው፡፡ የተራራው ጫፍ ለሕይወታችን በቂ ይመስላል፡፡ እኛ ግን ስላየነው ብቻ ሰማዩም ይናፍቀናል፡፡(ሰማይ በትርጉሙ የማይደረስበትን ቦታ ያመለክታል) መጣጣራችን በቂ የሆነውን የተራራውን ጫፍ ቢያስገኝልንም  ለድካም ወደ ከፍታው እንዘላላን፡፡ በእርግጥ አለመርካት ተፈጥሮአዊ ቢሆንም፡፡

ቃላት ነገሮችን የመግለጥ ሙሉ አቅም ላይኖራቸው ይችላል፡፡ ነገር ግን አንድን ነገር ከመግለፅ ውጪ አልተፈጠሩምና በስም ጠርተን የለም የምንለው ነገር አይኖርም፡፡ ገና ጥንት ተፈጥሮአል፡፡

አሁን አሁን የሰውን ሐሳብ ማክበር ከዘመናዊነት ጋር ተያይዟል፡፡ ሐሳብን እንዳለ መቀበልም ሥልጣኔ አድርገነዋል፡፡ በዚህ ውስጥ ራስን የመግለጥ ጉዳይ( ነፃ ሰው ለመባል) ወይም ያንን ለመግፋት መብት ካለመኖራችን ውስንነት ጋር ተያይዞ የሕይወትም በውሳኔ ያለመፅናት ክፍተት ታክሎበት ስህተት የለም ሁሉም ነገር ትክክል ነው ወደሚል ዳርቻ እየተገፋን ይመስለኛል፡፡

ለእኛ የሚጠቅመን እውነት የፈጣሪ መኖር ሊሆን ይችላል፡፡ ‹‹ፈጣሪ ባይኖር እንኳ ልንፈጥረው ይገባል›› እንዳለው ፈላስፋው፡፡ ነገር ግን ይህንን መመስከር እና ማውራት ቀላል በመሆኑ እንዲህ ያለው እውነት በጥበብ ከተሞላው ውሸት ያነሰ ሆነ፡፡

ውሸት ውስጥ አስደናቂ ጥበብ የሚገርም ጭንቅላት አለ፡፡ በዚህ ውስጥ ጎበዝ የሚያስብል ሰዎኛ መስፈርት በጉልህ ይታያል፡፡ መዋሸት የዓለምን አድናቆት በእውነት መመስከርም ተፈጥሮአዊ ፍርሃትን ይዘዋል፡፡

አንድ ነገር ግን እርግጠኛ መሆን እንችላለን፡፡ ማንም ዓለምን የሚገልጥ አስታራቂ ሀሳብ ሊያገኝ አይችልም፡፡ ምንም እንኳ በዚህ ንግግር ውስጥ የሰው ልጅ ነገን ባለማወቁ ጥላ ውስጥ የተደበቀ አንድ ሐሳብ ቢኖረውም፡፡

ታላላቅ ፈላስፎች የሚሰማንን ጭንቀት አብዝተው ስለተነፈሱት ከጥያቄዎቻችን መመሳሰል የተነሳ ነፍሳችን እረፍት(መልስ) ፍለጋ ወደ ህይወታቸው ታዘነብላለች፡፡ ጭንቀታችንን ስለተጋሩን መፍትሄውንም ከእነርሱ መጠበቅ እንጀምራለን፡፡ መረጋጋታችን በነሱ መልስ ላይ የተደገፈ ይሆናል፡፡ አስረውናልና እስኪፈቱን እንጠብቃለን፡፡

ቆይተን መውደቅ ለአዋቂዎችም እንዳለ ስንረዳ መደገፋችን ከንቱ እንደሆነ ይገባናል፡፡ ከዚህ ሁሉ መዋተት ግን ምስጢሩ እንደማይገባን ተረድተን ከእውቀት በላይ በሆነው መረዳት እና ዕምነት መኖር የሚበልጥ ይመስለኛል፡፡ ፍጡር ፈጣሪውን ሊረዳው እንጂ ጨርሶ ሊያውቀው አይችልም፡፡ ይህም በእምነት እንጂ በዕውቀት አይሆንም፡፡ ያኔ ትርፉ እረፍት ይሆናል፡፡

ማንም ሕይወትን ጨርሶ አልኖራትም፡፡ በደረጃ የምንበላላጥ ብንሆንም ሁላችንም ለሕይወት ተማሪዎች ነን፡፡  

ዮሐንስ በላይ
📗📒📕📗📒📕📗📒📕📗📒📕
ሼር ማድረግ እንዳይረሳ👍@Abysinia
አስተያየት ✍️ @AbysiniansBot